Skógrækt áhugamannsins

01-grisjunHvað ungur nemur gamall temur, segir máltækið. Bloggarinn var svo lánsamur að eiga þess kost að starfa við skógrækt í nokkur sumur á unglingsárunum. Á myndinni má sjá hann ásamt vinnufélögunum í Austmannabrekku í Haukadal um 1960, en hann situr þar efst. Í baksýn er Laugafell sem er rétt við Geysi, sem sjá má glitta í á myndinni ásamt Íþróttaskóla Sigurðar Greipssonar þar sem nú er Hótel Geysir. Takið eftir að enginn skógur sést, fyrir utan nokkrar birkihríslur. Þarna er nú kominn gríðarmikill skógur með háum trjám.

Byrjað var á því að grisja birkikjarrið með kjarrsög. Kjarrsögin líkist  vélorfi, nema í stað bandspottans sem klippir grasið er hjólsagarblað. Bloggarinn er einmitt með ólarnar sem héldu uppi kjarrsöginni spenntar um axlir. Gerðar voru langar rásir í birkikjarrið upp eftir fjallshlíðinni með um 2ja metra millibili. Síðan var gróðursett í rásirnar, ýmist með skógræktarhaka eða bjúgskóflu. Plöturnar voru í búntum og berróta, en ekki í fjölpottabökkum eins og algengast er í dag.

Við gróðursettum í akkorði, eins og það var kallað. Mikill hugur var í mönnum og unnið langt fram á kvöld, enda náðu menn að planta vel yfir 1000 plöntum á dag, þ.e. hver og einn. Launin voru heldur hærri en jafnaldrar okkar fengu í almennri verkamannavinnu, og puðið örugglega miklu meira.

Þó mikið væri unnið í Haukadal, þá var einnig töluvert puðað í Heiðmörk og Skógræktarstöðinni í Fossvogi. Á þessum þrem sumrum lærðu menn mikið um skógrækt, grisjun, áburðargjöf og uppsetningu girðinga.  Líkaminn stæltist og útveran var mikil og holl.

Varla hefur bloggarann grunað þegar hann sat hugsi í Austmannabrekku að hann væri farinn að puða aftur fjórum áratugum síðar á eigin landi þar skammt frá. Fáeinir hektarar sem biðu óþreyjufullir eftir því að verða klæddir skógi. Reyndar vill svo til að landskikinn er á myndinni í beinni línu lárétt fyrir framan höfuð hans. Svosem tvær eða þrjár höfuðbreiddir. Kanski var hann að dreyma eitthvað í þeim dúr.  Segja má að sagan endurtaki sig, því réttum fjórum áratugum eftir að myndin var tekin var aftur hafist handa við að girða, græða upp, planta og bera á. Næstum á sama stað og nú er sprottinn fullvaxinn skógur, skógur sem hann gerði með eigin höndum.

Fyrir fáeinum árum var verið að grisja í Austmannabrekku. Þetta voru engin smá tré. Gamli skógarrefurinn stóðst ekki mátið og taldi árhringina. Viti menn, þetta gátu verið litlu berróta plönturnar sem hann plantaði um 1960 ásamt félögum sínum. Undarleg tilfinning liðaðist um kroppinn.

Fjöldi Íslendinga dundar sér við að setja niður plöntur sér til ánægju, enda fátt sem veitir jafn mikla gleði. Tilgangurinn er ekki að rækta nytjaskóg, heldur að bæta land sem oft hefur farið illa, meðal annars vegna ofbeitar. Skógurinn veitir skjól og fuglarnir þyrpast að. Opið stormasamt land breytist í skjólgóðan unaðsreit. Ekki sakar ferska loftið og hreyfingin sem stælir líkama kyrrsetumannsins.

Maja og Julie

Hvað ungur nemur gamall temur, segir í upphafi. Hér má sjá tvær hörkukonur aðstoða við gróðursetninguna. Önnur kynslóð tekin til starfa. María Björg Ágústsdóttir var í íslenska kvennalandsliðinu í knattspyrnu, en Julie Chu silfurverðlaunahafi á Ólympíuleikjunum 2002, 2010 og 2014 og bronsverðlaunahafi 2006. Báðar voru vinkonurnar í sumarleyfi frá námi við Harvard þegar myndin var tekin. Ekki er amalegt að fá svona hjálp smile.

 

Það er auðvitað alveg ljóst, að afköstin, þegar verið er að dunda við áhugamannaskógrækt, eru ekki nema brot af afköstum atvinnumanna.

Bloggarinn afkastaði vel yfir 1000 plöntum á dag á unglingsárunum, en það þykir honum í dag mátulegur skammtur yfir sumarið. Auðvitað er ekki nóg að koma plöntunum í jörð. Alls konar stúss fylgir að sjálfsögðu, en það eykur bara ánægjuna. Á myndinni má sjá 400 plöntur bíða þess óþreyjufullar að komast í jörð, en bak við þær eru bakkar undan um 2000 plöntum.Góður helgarskammtur

Sjálfsagt er fátt sem kennir manni þolinmæði eins vel og gróðursetning trjáplantna í íslenskri náttúru.

Plönturnar eru viðkvæmar og þarf að hlúa vel að þeim í æsku, alveg eins og mannfólkinu. Þeim veitir ekki af hollri fæðu og þurfa áburðargjöf fyrstu árin. Stundum koma vorhret sem fara illa með litlu greyin, en flest komast þó á legg um síðir. Þegar þau hafa náð manni í hné finnst manni að kominn sé vísir að skógi. Ekki ósvipuð tilfinning og þegar litlu börnin læra að ganga.  Stærstu trén eru nú orðin um mannhæðar há, þó flest séu ennþá verulega minni.

Á unglingsárum plantaði bloggarinn líklega einhverjum fáum tugum þúsunda, en um fimmþúsund á undanförnum árum.

Vefsíðan www.kolvidur.is segir mér að ég þurfi að gróðursetja 60 tré á ári til að friða samviskuna. Hvað ætli ég sé búinn að kolefnisjafna fyrir mörg ár?

 

 

 

 


« Síðasta færsla | Næsta færsla »

Athugasemdir

1 Smámynd: Rúna Guðfinnsdóttir

Ég verð að segja að þetta er dugnaður í fyrsta klassa! Ekki hefði ég þolinmæði í þetta, það er alveg á hreinu. Þetta eru myndarlegar stúlkur sem hjálpa þér þarna. En burtséð frá dugnaði og öðru hrósi og ég fari nú í veraldlegri mál..eitthvað kostar þetta..ekki satt? Hvað kostar svona planta? Þetta hlýtur að kosta formúgu?!

Rúna Guðfinnsdóttir, 7.6.2007 kl. 19:52

2 Smámynd: Ágúst H Bjarnason

Sæl Rúna

Ætli skógarplanta kosti ekki um 50 til 80 krónur stykkið. 1000 plöntur á ári eru þá álíka mörg þúsund. Reyndar framleiddi ég 150 aspir sjálfur í vor með því að setja græðlinga í mold í bökkum. Einu sinni ræktaði ég líklega um 400 slíkar. Stundum hef ég sett aspargræðlinga beint í jörð og er árangurinn sæmilegur, þó hann sér ekki alveg eins góður og þegar forræktað er og plantað með staf.  Kostnaðurinn er því nokkuð afstæður.  Mest hef ég þó plantað af birki og furu.

Ágúst H Bjarnason, 7.6.2007 kl. 20:07

3 Smámynd: Salvör  Kristjana Gissurardóttir

Skemmtileg frásögn. Ég smitaðist sjálf af skógræktaráhuga þegar ég vann sem unglingur í Heiðmörk í unglingavinnunni og svo einn sumarpart hjá skógræktinni í Fossvogi.

Salvör Kristjana Gissurardóttir, 8.6.2007 kl. 07:25

4 Smámynd: Ágúst H Bjarnason

Skógræktarsmitið er kanski eins og rótarsmitið á lúpínunni. Fylgir manni alla tíð

Ég sé reyndar að ég hef gleymt Hreggstaðavíðinum hér fyrir ofan í athugasemdunum. Ég hef notað hann töluvert, enda harðger og vex hratt. Hef fjölgað honum sjálfur með græðlingum.

Ágúst H Bjarnason, 8.6.2007 kl. 09:02

5 identicon

Gaman að lesa þetta.  Eitthvað hefur þetta svæði togað í þig fyrst þú ert kominn með eigin skika þarna og farinn að planta á ný.  Til hamingju og gangi ykkur vel.  Stelpurnar eru vafalaust ánægðar  að fá að taka þátt!  Brosa afskaplega fallega á myndinni!  Kveðja.  Auður

Auður Matthíasdóttir (IP-tala skráð) 8.6.2007 kl. 17:06

6 Smámynd: Ágúst H Bjarnason

Takk fyirir kveðjurnar Auður. Auðvtað hefur eitthvað togað í, og það fast.

Skilaðu kveðju og lítið við erf þið eigið leið um sveitina. Bestu kveðjur. 

Ágúst H Bjarnason, 9.6.2007 kl. 09:50

7 identicon

Teikningar og myndir frá "The Al Gore Church of the Hotter Day Saints "

http://www.qubetv.tv/members/visit/HoleyHands

Siggi (IP-tala skráð) 18.6.2007 kl. 01:20

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Höfundur

Ágúst H Bjarnason
Ágúst H Bjarnason

Verkfr. hjá Verkís.
agbjarn-hjá-gmail.com

Audiatur et altera pars

Aðeins málefnalegar athugasemdir, sem eiga ótvíætt við efni viðkomandi pistils, og skrifaðar án skætings og neikvæðni í garð annarra, og að jafnaði undir fullu nafni, verða birtar. 

Um bloggið

Ginnungagap

Ýmislegt

Loftslag

Click to get your own widget

Teljari

free counters

Álverð

http://metalprices.com/PubCharts/PublicCharts.aspx?metal=al&type=L&weight=t&days=12&size=M&bg=&cs=1011&cid=0

Sólin í dag:

(Smella á mynd)

.

Olíuverðið í dag:

Heimsóknir

Flettingar

  • Í dag (29.3.): 6
  • Sl. sólarhring: 9
  • Sl. viku: 75
  • Frá upphafi: 761791

Annað

  • Innlit í dag: 6
  • Innlit sl. viku: 59
  • Gestir í dag: 6
  • IP-tölur í dag: 6

Uppfært á 3 mín. fresti.
Skýringar

Eldri færslur

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Innskráning

Ath. Vinsamlegast kveikið á Javascript til að hefja innskráningu.

Hafðu samband