Ábyrgð ríkisins á innlánum í Bretlandi og Hollandi takmarkist við Tryggingasjóð.

Stefán Már Stefánsson prófessor og Lárus Blöndal hæstaréttarlögmaður skrifuðu mjög athyglisverða grein sem nefnist Ábyrgð ríkisins á innlánum  í Mbl. miðvikudaginn 15. október. Bloggarinn tekur heils hugar undir það sem þar kemur fram.

Í greininni segir í upphafi:

"Í OPINBERRI umræðu kemur fram að íslensk
stjórnvöld séu langt komin að semja við Breta og
Hollendinga um mörg hundruð milljarða króna
skuldbindingar vegna starfsemi útibúa Landsbanka
Íslands í þeim löndum. Við undirritaðir
teljum nauðsynlegt að lagagrundvöllur sé skoðaður
rækilega áður en slíkir samningar verða endanlegir."

Síðar segir í grein lögmannanna:

"Íslenska ríkið hefur í hyggju að greiða íslenskum
innlánseigendum fjárhæðir til að tryggja innstæður
þeirra. Taki ríkið á sig slíkar skuldbindingar
og greiði úr ríkissjóði myndu þær greiðslur
vera umfram skyldur íslenska ríkisins í þeim tilgangi
að tryggja að unnt væri að starfrækja innlenda
innlánastarfsemi í framtíðinni og til að
tryggja efnahagslegan stöðugleika. Slíkar
greiðslur koma EES-samningnum í raun réttri
aðeins óbeint við enda myndu þær ekki fara fram
á gildissviði hans nema í undantekningartilvikum.
Evrópskar skuldbindingar felast aðeins í þeim
Tryggingasjóðum sem að framan eru nefndir og
þeim reglum sem um þá gilda. Þær reglur snerta
einkavædda banka og Tryggingasjóð sem er sjálfstæð
stofnun en ekki íslenska ríkið. Þær ráðstafanir
sem ríkið gerir til að halda uppi efnahagslegum
stöðugleika í framhaldi af því eru því
annars eðlis. Hefði ríkið hins vegar breytt lögum
um Tryggingasjóð með þeim hætti að innlánseigendum
hefði verið mismunað eftir búsetu kynni
slíkt að brjóta í bága við reglur EES-samningsins".

"Meginniðurstöður okkar eru eftirfarandi:
Ekki hvílir nein ábyrgð á ríkissjóði vegna stöðu
innstæðna í Tryggingasjóðnum.
Lagabreyting sem gerir ráð fyrir að innlánskröfur
verði forgangskröfur getur staðist ef hana
má réttlæta með skírskotun í neyðarrétt.
Greiðslur sem ríkið tekur á sig að inna af hendi
til innstæðueigenda hér á landi falla almennt utan
gildissviðs EES-samningsins nema í undantekningartilvikum".

 

Það er deginum ljósara að mikil hætta er á að íslensk stjórnvöld séu þegar í samningum við Breta og Hollendinga um skuldbindingar sem geta gert okkur, börn okkar og barnabörn að þrælum um ókomin ár. Það má alls ekki gerast.

Sem betur fer er Pétur H. Blöndal formaður efnahags- og skattanefndar Alþingis sammála lögmönnunum. Hann segir það vafasama hugmynd að íslensk stjórnvöld skrifi upp á óútfylltan tékka til að mæta kröfum hollenskra og breskra Icesave reikningseigenda."Ég held að það sé alls ekki hagur þessara þjóða að Íslendingum sé varpað í myrkur fátæktar og örbirgðar" er haft eftir Pétri í Mbl. í dag.

Nú verða stjórnvöld að gæta sín á að gera ekkert í fljótfærni. Það má alls ekki gera neitt sem varpar okkur í myrkur fátæktar og örbirgðar.  Munum að það var hlutafélagið Landsbankinn sem kom okkur í þessar ógöngur.

Alþingi hlýtur að verða að fjalla um og samþykkja allar skuldbindingar og samninga í þessu máli.

 

 

 

 Smella þrisvar á mynd til að lesa

 

www.nyjaisland.is

Athugasemdir

[Haukur Nikulásson, 17.10.2008 kl. 07:57]

Miðað við það efnahagslega ofbeldi sem bretar beita okkur þá held ég að við eigum að grípa til þeirra nauðvarna sem mögulegar eru innan laga og réttar.

[Loftur Altice Þorsteinsson, 17.10.2008 kl. 10:05]

Ég óttast ekki, að stjórnvöld leiki af sér. Núna sýnist mér mikilvægt að vinna tíma og koma fjármálalífinu í gang aftur. Málefni Tryggingasjóðsins verður að reyna að geyma til síðari tíma.

Ef ég man rétt, þá eru engin ákvæði í reglum Tryggingasjóðs um greiðslutíma bótanna. Stjórnvöld í Bretlandi og Hollandi verða því að sjá um fyrstu greiðslur og róa sitt eigið fólk og við afgreiðum mál Tryggingasjóðsins síðar, þegar um hægist. Raunar hélt ég að slíkt samkomulag hefði verið gert við Hollendingana ?

[Ívar Pálsson, 17.10.2008 kl. 10:20]

Sammála, Ágúst. Það er gott að Pétur Blöndal er kominn í málið því að hann er gjarnan fylginn sér, þótt hann verði oft einfari fyrir vikið. Bindandi aðgerðirnar stjórnvalda valda mér áhyggjum, ekki aðgerðarleysi, því að bankarnir þurftu að mæta örlögum sínum eins og aðrir bankar heimsins.

[Loftur Altice Þorsteinsson, 17.10.2008 kl. 10:53]

Hér eru lög Tryggingasjóðsins: http://www.althingi.is/lagas/nuna/1999098.html

og hér heimasíða hans: http://www.tryggingarsjodur.is/

[Loftur Altice Þorsteinsson, 18.10.2008 kl. 14:45]

Mig langar að taka enn og aftur undir þessi viðhorf lögfræðinganna. Erlend bankalán til innlendra banka verða ekki greidd að fullu, nema um verulega langan greiðslufrest semjist. Erlendum lánadrottnum er hótað, að ef þeir ekki semja verða erlendu hlutar bankanna settir í gjaldþrot og þá fá þeir bara lítinn hluta krafna sinna greiddan. Íslendska ríkið hefur ekkert með rekstur bankanna (erlenda hlutann) að gera nema samræma þessar aðgerðir gagnvart erlendum kröfuhöfum.

Íslendska ríkið er ekki einu sinni ábyrgt fyrir greiðslum úr Tryggingasjóði innistæðueigenda og fjárfesta. Sjóðurinn er SJÁLFSEIGNARSJÓÐUR og hann hefur engan kröfurétt á hendur Íslendska ríkinu. Ég bendi mönnum á, að lesa 10.grein laganna um sjóðinn:

10. gr. Fjárhæð til greiðslu.
Nú hrökkva eignir viðkomandi deildar sjóðsins ekki til þess að greiða heildarfjárhæð tryggðra innstæðna, verðbréfa og reiðufjár í hlutaðeigandi aðildarfyrirtækjum og skal þá greiðslu úr hvorri deild skipt þannig milli kröfuhafa að krafa hvers þeirra allt að 1,7 millj. kr. er bætt að fullu en allt sem umfram er þessa fjárhæð skal bætt hlutfallslega jafnt eftir því sem eignir hvorrar deildar hrökkva til. Fjárhæð þessi er bundin við gengi evru (EUR) miðað við kaupgengi hennar 5. janúar 1999. Sjóðurinn verður ekki síðar krafinn um frekari greiðslu þótt tjón kröfuhafa hafi ekki verið bætt að fullu.

[Ágúst H Bjarnason, 19.10.2008 kl. 09:15]

Loftur.

Lögin eru alveg skýr. Þess vegna eigum við íslendingar ekki að greiða innistæðueigendum vegna útibúa bankanna erlendis neitt umfram það sem kveðið er á í lögunum. Annað væri mikil fásinna.

[Loftur Altice Þorsteinsson, 19.10.2008 kl. 16:55]

Það undarlega er Ágúst, að fjölmargir sem tjá sig um mál Tryggingasjóðsins hafa ekki lesið lögin. Sumir virðast ekki heldur hafa hugmynd um hvað hlutafélaga-formið merkir.

Menn endurtaka hver eftir öðrum, að Íslendska ríkið skuldi einka-aðilum úti í heimi þúsundir milljarða. Annar hver maður, virðist ekki hafa hugmynd um megin-atriði málsins.

Þegar líður frá munu menn þó koma niður á jörðina og hætta að jarma hver upp í annan, eins og skelkuð lömb í haustréttum.