Myndvinnsluforrit fyrir jólamyndirnar...

 

 

 

Fyrir réttu ári var fjallað um einfalt myndvinnsluforrit á þessum síðum í pistlinum  Ókeypis og auðvelt myndvinnsluforrit: Picasa-3 frá Google.

Þrátt fyrir önnur miklu öflugri myndvinnsluforrit er Picasa það sem bloggarinn notar mest, enda er það einstaklega þægilegt í notkun.  Það er þó tæplega hægt að kalla það myndvinnsluforrit, því frekar er um að ræða forrit til að flokka myndir og raða í albúm, hvort sem er í tölvunni eða á vefnum. Það er þó hægt að framkvæma á einfaldan hátt allar helstu aðgerðir til að klippa til myndir, laga lit og birtu, ásamt því að prenta út myndir. Allar þessa aðgerðir eru einstaklega auðveldar, og svo sakar ekki að Picasa er ókeypis. 

Á vef Kennaraháskólans má finna leiðbeiningar. Kári Harðarson fjallar um hvernig nýjasta Picasa getur þekkt andlit hér.

Þó Picasa sé frábært forrit til að flokka myndir og lagfæra hefur það þó sínar takmarkanir. Picasa er alls ekki sambærilegt við Photoshop, en það er líka dálítill munur á verðinu, því sjálfsagt kostar Photoshop um hundarð þúsund krónur. Photoshop er reyndar óþarflega fullkomið og flókið fyrir flesta aðra en atvinnumenn.

Sem betur fer eru til alvöru myndvinnsluforrit sem kosta mun minna en Photosop og eru jafnfram auðveldari í notkun. Hér verður minnst á fáein þeirra. Menn mega gjarnan benda á önnur í athugasemdunum, eða segja sína skoðun.

 

Ókeypis myndvinnsluforrit sem lofar góðu, en fáir vita um, er Gimp. Forritið er í stöðugri þróun og er hægt að nálgast síðustu útgáfu á vefsíðunni www.gimp.org  Gimp á fjölmarga aðdáendur og hefur verið boðið upp á námskeið um það á Íslandi.  Þó ég hafi hlaðið niður þessu forriti, þá hef ég mjög takmarkaða reynslu af því og væri áhugavert að heyra af reynslu manna.

 

 

 

Corel selur ágætt myndvinnsluforrit sem heitir Paint Shop Pro X2. Sjá vefsíðu hér.   Þetta er mjög öflugt forrit og getur flest af því sem maður hefur þörf fyrir og gerir það vel. Þetta forrit keypti ég fyrir mörgum árum, en nýjasta útgáfan er miklu betri. Forritið kostar aðeins $59 hjá Corel, en þar er einnig hægt að fá forritið lánað til reynslu. Sjálfsagt er að notfæra sér það.  Veit ekki hvort forritið er selt í verslunum hér á landi. (Myndin efst á síðunni er af þessu forriti).  Mjög gott.

 

 

 

Adobe selur Photoshop Elements 8 sem er litli bróðir hins stóra og fullkomna Photoshop CS4. Sjá vefsíðu Adobe hér. Með Photoshop Elements er hægt að gera flest allt sem venjulegur áhugamaður gerir með Photoshop, en á auðveldari hátt.  Þeir sem hafa notað Photoshop vita hve erfitt er að ná tökum á því án tilsagnar. Photoshop elements getur hver sem er notað frá fyrsta degi, þar sem helstu aðgerðir til að lagfæra myndir er hægt að nálgast á einfaldan hátt. Smám saman lærir maður á flóknari aðgerðir, og auðvitað er helsti kosturinn að þá lærir maður um leið á gamla stóra Photoshop, þvi skyldleikinn leynir sér ekki. Forritið er hægt að fá lánað til reynslu hér, en það fæst m.a hjá Nýherja. Nokkur myndbönd hér.  Mjög gott.

 

Hvort er betra  Paint Shop Pro X2 eða Photoshop Elements 8? Sjálfsagt má deila um það endalaust. Paint Shop Pro X2 er heldur ódýrara og getur sumt betur en Photoshop Elements 8, en líklega eru þetta mjög sambærileg forrit. Sjálfur hef ég notað  Photoshop Elements 8 undanfarið og líkar vel.

 

 

Margir eru miklu fróðari um þessi mál en bloggarinn, en hann notar Picasa lang mest til að hafa yfirlit yfir myndirnar, lagfæra smávegis og raða þeim í allbúm. Síðan er gott að grípa til öflugra forrits fyrir þessar fáeinu myndir sem óvart eru verulega góðar, en þær eru varla fleiri en ein af hverjum hundrað. Þá reynist Photosho Elements 8 vel.

 

Fróðlegt væri að fá ábendingar og reynslusögur...

 

Athugasemdir

[Finnur Bárðarson, 26.12.2009 kl. 17:07]

Pixelmator, Photoshop fátæka mannsins

[Sigurður Sigurðsson (IP-tala skráð) 26.12.2009 kl. 21:48]

Picture Window Pro  http://www.dl-c.com/

[Egill Óskarsson, 27.12.2009 kl. 00:33]

Gimp er mjög fínt forrit sem ég gríp ennþá í öðru hverju, þó að ég sé kominn með Photoshop. Besta 'einfalda' forritið sem ég hef notað heitir hins vegar PhotoScape. Það er frítt, auðvelt í notkun og býður upp á allt það helsta nema menn ætli sér í mjög nákvæma og ítarlega myndvinnslu.

[Magnús Óskar Ingvarsson, 27.12.2009 kl. 08:08]

Það er illt að dæma um gæði forrita þegar maður þekkir bara eitt. Ég hef notað ACDSee, sem mér líkar vel við. Ég er líka trúaður á þá kenningu að besta forritið er það sem þú ræður vel við. Mér tókst nokkurn veginn að ráða við ACDSee en hin hef ég bara alls ekki prófað!

[Ágúst H Bjarnason, 27.12.2009 kl. 08:59]

Það er fróðlegt að fá ábendingar um þessi myndvinnsluforrit sem þið notið. Það er líklega rétt hjá Magnúsi að besta forritið er það sem maður ræður vel við. Þess vegna skiptir máli að það sé auðvelt í notkun.

Ég er nýbúinn að skanna gömlu skyggnurnar sem reyndust vera tæplega 1500 talsins. Notaði Epson 4990 með Digital ICE. Myndirnar koma "ryklausar" úr skannanum og litleiðréttar þannig að aðeins þarf að klippa utan af þeim og endurraða í möppur/albúm. Til þess nota ég Picasa.

[Valur (IP-tala skráð) 27.12.2009 kl. 11:50]

Paint.net er frábært, ókeypis myndvinnsluforrit. Einfalt í notkun en þó öflugt.

Sjá http://www.getpaint.net/index.html

Og ekki skemmir fyrir að til eru íslenskar leiðbeiningar fyrir það sem Vigfús Hallgrímsson þróunarfulltrúi grunnskóla hjá Hafnarfjarðarbæ á heiðurinn af. Veit samt ekki hvort til er nýrri handbók en fyrir útgáfu 3.36.

http://www.hafnarfjordur.is/hafnarfjordur/upload/files/pdf/skolaskrifstofa/hugmyndablod/paintnethandbok336.pdf

[Ágúst H Bjarnason, 27.12.2009 kl. 12:55]

Valur.

Mér lýst mjög vel á forritið Paint.net sem þú bentir á. Ég skimaði yfir handbókina og dáðist af hve vel hún er skrifuð. Með þessu forriti og íslensku handbókinni er auðvelt að ná tökum á helstu aðgerðum í myndvinnsluforritum. 

[Ágúst H Bjarnason, 27.12.2009 kl. 16:28]

Handbók fyrir Photoshop Elements 8 má finna hér. 

Gæti tekið smá stund að hlaða skjalinu (300 bls.) niður.

[Ragnar Eiriksson (IP-tala skráð) 27.12.2009 kl. 22:52]

Náði í GIMP 2 en fannst það ekki nógu auðskilið fyrir mig, penslar og málning útum allt!    Náði í annað "Free Picture Resizer" og skildi það svona til heimabrúks, það tekur meira að segja heilu möppurnar fyrir ef maður vill!   Sá að einhver nefndi ACDSee hér að ofan, vildi að ég hefði lesið athugasemdina fyrr því ég notaði það forrit fyrir hrun (tölvunnar) og líkaði vel en mundi ekki eftir því núna!

Jólakveðja,

Ragnar Eiríksson

[Marta B Helgadóttir, 28.12.2009 kl. 02:06]

Margt fróðlet hér að vanda. Takk Ágúst.

[Eyjólfur Sturlaugsson, 29.12.2009 kl. 05:35]

Fróðlegt að lesa um þessi mál hjá þér Ágúst.  Ég hef fyrst og fremst notað Photoscape og haldið mér við það þótt ég hafi kynnst ýmsum öðrum.  Hugbúnaðurinn er algjörlega frír,  virkar mjög vel með ljósmyndir og höfundar hafa verið duglegir við að uppfæra hann.

[Björn Geir Leifsson (IP-tala skráð) 29.12.2009 kl. 12:04]

Mac-notendur eru að sjálfsögðu ekki á flæðiskeri staddir með myndvinnslu enda er sá heimur vinsæll í listum og hönnun.

Það fylgja MacOS myndvinnsluverkfæri sem nægja flestum (iPhoto og Preview

Picasa er til fyrir MacOS og virkar fínt.

Graphic Converter er Shareware forrit sem kostar aðeins um 30 Evrur og er gríðarlega öflugt. Sumir vilja meina að Photoshop sé óþarft ef maður hefurþetta forrit en um það skal ég ekki dæma. Graphic Converter er búið að vera til vel á annan áratug amk og höfundurinn Thorsten Lemke hefur verið einstaklega duglegur við að halda því við og endurbæta. http://www.lemkesoft.com/