Að vera engill í eigin tré...

 

 

 

 

Hvers vegna er maður að eyða tíma og þreki í að pota litlum trjáplöntum í jörð og gefa ungviðinu áburð? 

Fyrir skömmu var ég kominn snemma út í móann til að lífga aðeins upp á hann dágóðan spöl frá kofanum, vopnaður plöntustaf, bökkum með skógarplöntum og áburðarfötu. Hitinn var mátulegur fyrir útivinnu, um 13 gráður en nokkuð stífur norðanvindur sem náði að þeyta nokkrum regndropum yfir hálendið og væta mig aðeins. Hálf hryssingslegt veður um tíma, en nokkru síðar kom sólin með sína heitu geisla. 

Hvers vegna var ég að standa í þessu, spurði ég sjálfan mig. Þetta verður varla skógur fyrr en ég er löngu dauður... Í mínum hugskotssjónum sá ég þó fyrir mér fallegan skógarlund, og kannski var það þessi sýn sem dreif mig út snemma morguns.

 

Hákon Aðalsteinsson orti snilldarlega um þessa framtíðarsýn skógræktarmannsins. Kvæði hans hljómaði í eyrum mínum meðan vindurinn gnauðaði og spóinn í móanum söng af hjartans lyst. Í kvæðinu er skógarbóndinn horfinn yfir móðuna miklu, en nýtur fegurðar skógarins sem hann skóp með eigin hendi.

Það hlýtur að vera í lagi að láta sig dreyma, meðan maður er að skapa skóg, að verða einhvern tíman engill í eigin tré, eins og segir í kvæðinu.

 

 

 

 

 

 

 

 

 

 

 

Hákon Aðalsteinsson skáld og skógarbóndi á Húsum í Fljótsdal lést árið 2009.

Hann var landsþekktur hagyrðingur.

Athugasemdir

[Bjarni Jónsson, 10.8.2013 kl. 12:32]

Sæll, Ágúst;

Það má láta sig dreyma um engilstilveru eftir þessa jarðvist,  en gróðursetning kemst nálægt engilstilveru hérna megin.  Ég geri ráð fyrir, að þú hafir fyrir löngu séð árangur erfiðis þíns í formi myndarlegs skógarlundar.  Við hjónin gróðursettum með góðra manna hjálp vænan lund og girtum af árið 1977.  Þar eru tré nú 25 m há, og lundurinn býður upp á grisjunarvinnu, þegar hugurinn girnist.  Niðurstaðan af þessum þönkum er, að vinnan veiti hamingju hér á jörðu, þ.e. vinna ánægjunnar vegna, en ekki endilega til að eiga fyrir salti í grautinn.  Skjólið, sem lundir og skógar veita, er ómetanlegt.  Um þetta gildir þó einnig, að allt orkar tvímælis, þá gert er.  Fuglalíf og gróðurfar breytist við skógræktina, en þá ber að líta til þess, að maðurinn eyddi skógum á Íslandi í neyð sinni.  Við erum að bæta fyrir þetta.

Með góðri kveðju /

[Gunnar Th. Gunnarsson, 10.8.2013 kl. 13:54]

Einhvern tíma var mér sagt að eftirfarandi væri kínversk speki: "Trén vaxa meðan mennirnir sofa".

Mér finnst þetta dálítið djúpt, eins og margt fleira, þaðan sem keisarans hallir skína. 

[Ágúst H Bjarnason, 10.8.2013 kl. 14:21]

Sæll Bjarni.

Mér þykir ólíklegt að Hákon Aðalsteinsson hafi trúað á engla frekar en ég, en kvæðið þykir mér snjallt og vel gert, og því birti ég það       

Landið eignuðumst við  ekki fyrr en um aldamótin síðustu, en vissulega sé ég mikinn mun. Hef plantað um 8000 plöntum í landið sem var að mestu ófrjór ofbeittur lyngmói og skjól lítið.  Afföll því væntanlega frekar mikil, en töluvert lifir samt...  

Fyrir rúmlega hálfri öld plantaði ég einhverjum tugþúsundum þarna skammt frá í Haukadalsskógi og þar er auðvitað þéttur og fallegur skógur.  Það veitir manni ánægju að eiga smá þátt í þeim skógi. 

Á þesssum áratug sem ég hef dundað mér til mikillar ánægju við að bæta landið með trjáplöntum og græða upp moldarflög hefur orðið mikil og ánægjuleg breyting á fuglalífi. Hér hefur vafalítið verðið fallegur skógur á öldum áður og gott skjól, og þannig verður það vonandi aftur.

[Ágúst H Bjarnason, 10.8.2013 kl. 15:45]

Sæll Gunnar

"Trén vaxa meðan mennirnir sofa" er góð speki.

[Gunnar Th. Gunnarsson, 10.8.2013 kl. 16:03]

Já, kennir okkur að við þurfum ekki að bíða

[Bjarni Jónsson, 10.8.2013 kl. 17:42]

Ég kynntist Hákoni Aðalsteinssyni lítið, en segja má, að hann hafi verið eins konar goðsögn í lifanda lífi í ýmsum sveitum Austurlands.  Þó sigldi ég eitt sinn með honum á Ormi Lagarfljóts áður en fljótið var "fordjarfað" með foraðinu Jöklu.  Þar fór hann á kostum, og hafi hann verið þar með englavængi, voru þeir anzi sviðnir.  Hann hefur þó dreypt á miðinum úr Aski Yggdrasils og var sérlega orðhagur maður.  Skógræktina má nota í kolefnisbókhaldinu samkvæmt Kyoto-samkomulaginu.  Austur á Héraði hafa farið fram merkilegar mælingar á framleiðni skóga í þessa veru, þ.e. upptöku koltvíildis, á vegum Skógræktar ríkisins.  Ekki vænti ég, að þú hafir komið að þróun þeirrar mælitækni, eða hvað ? 

[Halldór Jónsson, 10.8.2013 kl. 18:06]

Fallega sagt hjá ukkur báðum frændi

[Ágúst H Bjarnason, 12.8.2013 kl. 15:17]

Sæll aftur Bjarni

Þú spyrð hvort ég hafi komið að þessari mælitækni, en svarið er nei.

Hákon hef ég þekkt lengi af afspurn, en var þó með honum í hópi ferðamanna á Ítalíu fyrir rúmum aldarfjórðungi. Hann var mjög sérstakur maður og er mikið til í að hann hafi verið goðsögn í lifanda lífi.