Nýsköpun: Andblær, nýstárlegt orkusparandi loftræsikerfi...

 

 

 

 

 

 

Starfsmaður Verkís, Jóhannes Loftsson verkfræðingur, verður í viðtali í kvöld klukkan 20:00 í þættinum Frumkvöðlar á ÍNN.

Hann er að þróa loftræstikerfið Andblæ, sem er nokkuð einstakt.

Það lækkar orkukostnað húsa með því að endurnýta megnið af varmanum í því lofti sem loftað er út og getur þannig borgað sig upp á skömmum tíma.  Ferskt hreinsað loft bætir einnig inniloftið og þar með lífsgæði allra þeirra sem inni dvelja. 

 

Örþunn hönnun Andblæs (4-6 cm), gerir kerfið lítt áberandi og fellur það vel inn í umhverfið án þess að sérstaklega þurfi að fela það.  Þetta mun t.d. gera Andblæ að einstakri loftræsilausn fyrir viðhald og endurbætur á eldri húsum, þar sem loftrými er oft takmarkað. 

Myndin efst á síðunni er af frumgerð tækisins.

Lesa má meira um Andblæ á heimasíðu Breather Ventilation. 
(www.breatherventilation.com (Opnast í nýjum vafraglugga) )

 

 

 

Frétt á vefsíðu Verkís: http://www.verkis.is/frodleikur/frettir/nr/4185

 

 

Athugasemdir

[Jósef Smári Ásmundsson, 19.11.2013 kl. 09:28]

Áhugavert. Hér í Noregi ( og sennilega líka á íslandi) hafa varmadælur rutt sér til rúms undanfarin ár. Með þeim er hægt að fjórfalda orkunýtingu raforkunnar til húshitunar. Spurði eitt sinn að því hvort ekki væri hægt að nýta heita loftið þegar um loftvarmadælu væri að ræða til loftræstingar í stað þess að dæla inn köldu lofti til þess í öðru kerfi. Fékk nú bara þvert nei frá Norðmönnunum-þeir eru nú bara svona. Sýnist nú að þetta sé vel hægt samkvæmt þessu. En eitt sem mig langar að spyrja verkfræðinginn þig að sem ég byggingarmeistarinn er ekki með á hreinu. Mér hefur nefnilega dottið í hug að á sama hátt að nota má raforkuna til að vinna ennþá meiri orku með varmadælu(þar sem orkan kemur iðrum jarðar eða stöðuvötnum) mætti nota hana til að vinna (rafgreina) vetnisorkuna úr hreinu vatni og auka með því endingu rafgeimisins í rafmagnsbílnum.Fletti upp á vísindavefnum og fann þar að 13200 joule þurfi til að rafgreina 1 gramm af vatninu en 16000 joule sem kemur við brunann. Ef þetta er rétt skilið hjá mér væri það kannski tilefni til rannsóknar hjá Verkís.

[Jóhannes Loftsson, 19.11.2013 kl. 13:25]

Sæll Jósef,  Andblær er í jafnvægis-loftræstikerfi, (balanced ventilation system), og blæs því lofti bæði inn og út úr húsinu.  Með því að leiða loftstrauminn í gegnum varmaskipti, þá endurnýtum við hitan úr loftinu sem við loftum út, þ.a. það kemur í raun kalt út.  Með þessu minnkum við orkutapið við loftræstinguna og drögum úr orkunotkun byggingarinnar. 

Kerfið okkar getur þannig unnið vel með varmadælum, sem vegna orkusparnaðarins við loftskiptin þurfa ekki að nota eins mikla orku.  

[Sigurbjörn Ólafsson (IP-tala skráð) 21.11.2013 kl. 07:22]

Bara smá athugasemd vegna þess að Jósef byggingameistari í Noregi, virðist hafa fengið það út að á vísindavefnum að orkunotkun við rafgreiningu á einu grammi af vatni sé 13200 joule og út komi nægilega mikið vetni til að gefa frá sér 16000 joule við bruna , þ.e.a.s yfir 20% meiri orka en fór inn í ferði, ég vildi að það væri satt, því þá væri þar kominn undirstaða alvöru fría orku  í eilífðarvél. En það sem er á ferðinn hér er að það er verið að rugla saman tveimur mælistikum svokölluðu lægra og hærra varmagildi vetnis,þetta veldur stundum ruglingi , en fræðilegt varmahágildi vetnis er          144 Kílójoule /gramm og þar eð það þyngdarhlutföllin á vetni og súrefni eru 1:8 í hreinu , þá þarf að rafgreina 9 gr af vatni til að fá 1 gramm af vetni hefur einhver deilt 9 í 14400 og fengið út 16000 joule, sem er í sjálfu sér rétt , en svo farið og fundið út að lágmarksspenna sem þarf í rafgreiningu er 1.23 volt og einhverja útleiðingu um að þá fáist að hægt sé fræðilega séð hægt að komast af með 13200 joule til að rafgrein eitt gramm vatns , þetta er í sjálfu sér líka rétt að vissu leiti, en þá er hortf fram hjá hlutum sem gera að verkum að það þarf smá yfirspennu , sem gerir að verkum að  voltin  hækka í 1.48, en það aftur kemur út með 16000 joule per gramm H20, m.ö.orðum sama orkumagn  inn og út úr dæminu, og TANSTAFL-lögmálið í fullu gildi ( TANSTAFL = "There Aint No Suchh Thing As Free Lunch" )  í orkubransanum, sem og annarstaðar.

Nóg um það , þessi loftræstigræja lítur út  fyrir að vera hið mesta þarfaþing, og ég vona að þeim sem að standa gangi vel með framhaldið á þessu , og verði fokríkir af . En ég var að velta fyrir mér er nokkuð mikið mál að víxla heita og og kalda loftstraumnum. Þ.e.a.s kæla loftið sem fer inn í húsið ef það það er hlýrra utanhúss en fólki þykir boðlegt innandyra og nýta samt orkuna sem til fellur. Það er sennilega ekki minni þörf fyrir það á suðlægari breiddargráðum en okkar a.m.k einhver hluta ársins.          

[Ágúst H Bjarnason, 21.11.2013 kl. 08:09]

Sælir Jósef og Sigurbjörn.

Þakka ykkur báðum fyrir  póstinn.  Ég var ekkert farinn að hugleiða spurningu Jósefs varðandi vetnið, en var svo ljónheppinn að Sigurbjörn kom með greinargóða skýringu.    Það má segja að gagn hafi verið í hvoru tveggja, spurningunni og svarinu, því án spurningarinnar hefðum við ekki fengið svona áhugavert svar.

Varðandi suðlægari breiddargráður, þá væri áhugavert að fá svar frá Jóhannesi Loftssyni.

[Jóhannes Loftsson, 21.11.2013 kl. 10:28]

Sæll Sigurbjörn, og takk fyrir athugasemdirnar.

Búnaðurinn okkar er með varmaskipti sem viðheldur varmaástandinu innandyra, hann endur nýtir því jafnt hita sem kulda úr því lofti sem loftað er út.  Þetta þýðir í prinsippinu að við 0° hitastig skilar hann loftinu inn um 16°  og við 30°C útihita skilar hann loftinu inn 22°C heitu.  (m.v. 80% hitaendurvinnslu, 20°C innihita).  Ekki þarf að breyta búnaðinum neitt til fyrir þetta.

Því til viðbótar, þá er hægt að útfæra varmaskiptinn þ.a. hann endurnýti raka, sem er mjög mikilvægt á suðlægum slóðum.  Til að ná kælingu niður fyrir 20°C þarf þó að að bæta við kælibúnaði. 

Vegna þess að kæliorka byggist oft á raforku og því að jafnaði töluvert dýrari en hitaorka er þessi suðlægi markaður að sjálfsögðu mjög áhugaverður.  Kælingin krefst þó aðeins flóknari búnaðar og þar sem það skiptir okkur miklu máli að koma tækinu sem fyrst á markað, þá er áherslan okkar nú að að þróa fyrst einfalda lausn sem hentar t.d. á norðurlöndunum. 

[Jósef Smári Ásmundsson, 23.11.2013 kl. 17:00]

Þakka þér fyrir svarið Sigurbjörn og útskýringuna Jóhannes.