Hákon Bjarnason efnilegur píanóleikari. Stjarna morgundagsins.

 

Í gær hlustaði ég á ungan frænda minn leika einleik á píanó með Sinfóníuhljómsveitinni. Þeir sem hafa fylgst með Hákoni Bjarnasyni, sem fæddur er 1987, vita að þar er enginn meðalmaður á ferð þó aðeins sé hann tvítugur að aldri. Dúx frá MH 2005 yngstur nýstúdenta og með langflestar einingar, um það bil að ljúka háskólaprófi, sigurvegari í ýmsum einleikarakeppnum, Íslandsmeistari í Karate, o.s.frv. Það er ekki lítið sem þessi hógværi og ljúfi drengur hefur afrekað!

Hákon er nemandi Halldórs Haraldssonar í Listaháskóla Íslands. Síðastliðna haustönn var Hákon í skiptinámi við Sibeliusar-akademiuna í Helsinki. Hákon hefur unnið til verðlauna í öll þrjú skiptin sem píanókeppni Íslandsdeildar EPTA hefur verið haldin. Tvisvar sinnum hefur hann hlotið fyrstu verðlaun og einu sinni þriðju.  Í vor mun hann ljúka bakkalárprófi frá Listaháskóla Íslands og væntanlega halda utan til framhaldsnáms í haust.

 Að sjálfsögðu þarf ekki að hafa mörg orð um frammistöðu Hákonar. Hún var einfaldlega stórfengleg, eins og frammistaða hinna ungu einleikaranna sem einnig léku með Sinfóníuhljómveitinni.  Það kom skemmtilega á óvart hve glæsilegt og hæfileikaríkt unga fólkið sem lék einleik með Sinfóníuhljómsveitinni er.  Hákon, Theresa, Arngunnur og Páll eru örugglega stjörnur morgundagsins.

Það var einstaklega ánægjulegt að sjá þennan unga pilt, Hákon Bjarnason, ganga inn á sviðið í upphafi tónleikanna klæddan kjólfötum og setjast af sama öryggi og þekktustu píanóleikarar við hljóðfærið og leika af fingrum fram Píanókonsert nr.1 eftir Sergej Prókofíev, sem  bæði er flókinn og hraður.

Þar sem ég er auðvitað mjög montinn af frænda mínum er vonandi í lagi að kynna aðeins hvernig við tengjumst. Alnafni minn og afi Ágúst H. Bjarnason prófessor (1875-1952) var langafi Hákonar.  Ágúst var sonur Hákonar Bjarnasonar kaupmanns á Bíldudal (1828-1877) sem rak þar verslun og þilskipaútgerð. Föðurbróðir  minn Hákon Bjarnason skógræktarstjóri (1907-1989) var afi Hákonar píanóleikara. Við getum rakið ættir okkar til vestfirskra galdramanna og ofurmenna, en ljóst er að Hákon ungi er einn slíkur þegar píanóið er annars vegar. 

 

Af vefsíðu Sinfóníuhljómsveitarinnar:

Sigurvegarar í einleikarakeppni Sinfóníuhljómsveitarinnar og Listaháskólans flytja einleiksverk.
Tækifæri til að kynnast stjörnum morgundagsins.

Hljómsveitarstjóri:	Kristofer Wahlander
Einleikari:	Hákon Bjarnason
Einleikari:	Theresa Bokany
Einleikari:	Arngunnur Árnadóttir
Einleikari:	Páll Palomares
Höfundur	Verk
Sergej Prókofíev:	Píanókonsert nr.1
H. Wieniawski:	Fiðlukonsert nr. 2
Claude Debussy:	Premier Rhapsody f. klarinett og hljómsveit
Jean Sibelius:	Fiðlukonsert

 

 

Úr frétt Morgunblaðsins frá 2005:

mbl.is | 23.12.2005 | 08:18      Átján ára piltur dúx í MH: Stefnir á feril í tónlist

„Ég hef alltaf haft mestan áhuga á raungreinum eins og stærðfræði og eðlisfræði og svo auðvitað tónlist," segir Hákon Bjarnason, sem útskrifaðist dúx frá Menntaskólanum við Hamrahlíð nú á miðvikudag. Hákon, sem brautskráðist frá náttúrufræðideild, er fæddur árið 1987 og er því átján ára. Hann var yngstur nýstúdenta og með langflestar einingar, auk þess sem hann var með óaðfinnanlega skólasókn allan námstímann.

...

Auk þess að vera dúx skólans fékk Hákon verðlaun fyrir árangur í stærðfræði og var með aðaleinkunn í kringum 9,3. Hákon segir lykilatriðið í árangrinum vera það að hann lærði það sem hann hafði brennandi áhuga á. "Ég hef getað valið mér það sem mér þykir skemmtilegast í skólanum og þurfti ekki að taka mikið af aukafögum sem ég hafði ekki áhuga á vegna þess að tónlistin gildir stóran hluta af einingafjöldanum," segir Hákon, sem hefur þegar hafið nám við Listaháskólann á tónlistarbraut. "Þar er ég á hljóðfæraleikarabraut, þar sem tekur þrjú ár að taka Bachelor of Music-gráðu. Síðan hef ég velt því fyrir mér að fara til útlanda aðeins fyrr sem skiptinemi á vegum skólans. Hvort sem ég klára hérna eða úti stefni ég á meistaragráðu í hljóðfæraleik úti."

Hákon stefnir á feril í píanóleik og hefur m.a. tekið þátt í keppnum á því sviði. Þá hefur hann einnig verið virkur í félagslífinu í MH. Tók hann m.a. þátt í uppsetningu á leikritinu Martröð á jólanótt, en þar lék hann á hljómborð og útsetti nokkur lög fyrir hljómsveitina. Einnig hefur Hákon tekið þátt í lagasmíðakeppninni Óðrík Algaula, þar sem hann lék á píanó í lögum vina sinna.

Píanóið er þó ekki eini afrekastaður Hákons, en hann æfði karate fyrir nokkrum árum og tók svarta beltið í þeirri íþrótt. Þá varð hann Íslandsmeistari í sínum aldursflokki. "Það hjálpar til að vera í góðu líkamlegu formi og hefur líka mikið að gera með agann," segir Hákon, sem þó hætti fyrir tveimur árum sökum tímaskorts."

Að auki syngur Hákon með Hamrahlíðarkórnum, en hann mun einmitt syngja í Dómkirkjunni á aðfangadagskvöld.

 

Athugasemdir

[Ásdís Sigurðardóttir, 11.1.2008 kl. 18:32]

Var einmitt að lesa um drenginn í blöðunum.  Greinilega snillingur hann frændi þinn. Til hamingju með hann.

[Ágúst H Bjarnason, 11.1.2008 kl. 18:50]

Takk Ásdís.

[Ásgeir Kristinn Lárusson, 11.1.2008 kl. 20:42]

Íslendingar -til hamingju með alla okkar ungu og efnilegu listamenn. Líka merkilegt, hvað tónlist og stærðfræði eiga oft vel saman...

[Halldór Jónsson, 11.1.2008 kl. 20:44]

Hann er líka frændi minn og ég er líka montinn af honum. Að vera svona jafnvígur til munns og handa er sjaldgæft finnst mér og margir eru bara á einu sviði. Ekki hann frændi okkar, sem allt virðist opið fyrir. Það bjargar honum að hann virðist ekkert uppnæmur fyrir þessu sjálfur heldur er af hjatrta lítillátur, háttprúður og hógvær ungur maður. 

[Predikarinn - Cacoethes scribendi , 12.1.2008 kl. 17:28]

Til hamingju Ágúst með frábæran árangur frænda þíns, Hákonar Jónssonar Bjarnason

[Ágúst H Bjarnason, 12.1.2008 kl. 17:39]

Við megum vera mjög stolt af okkar tónlistarfólki og öðrum listamönnum. Við eigum frábæra listamenn á öllum sviðum og nokkra framúrskarandi sem eru á heimsmælikvarða.

Svo er það allir okkar ungu og efnilegu listamenn sem eru í námi...  

[Bryndís R (IP-tala skráð) 13.1.2008 kl. 09:23]

Frábær árangur hjá frænda þínum. Til hamingju með hann