Ótrúlegt: Nýr GSM les hugsanir. Mállausir fá rödd. Sjá myndband.

Við lifum á ótrúlegum tímum. Nú er verið að þróa hálsband sem nemur taugaboð úr höfðinu og breytir í tal. Myndbandið sýnir hvernig hægt er að tala í gemsann án þess að nokkur verið þess var, og það án þess að hreyfa varirnar. Maður gæti haldið að þetta væri gabb, en svo er ekki.

Allir kannast við hvað það er kjánalegt að sjá mann standa einan í hrókasamræðum. Annað hvort er hann eitthvað skrítinn og er að tala við sjálfan sig, eða að hann er með blátönn í eyranu og er að tala í gemsann. Væri það ekki miklu snjallara ef maðurinn gæti látið nægja að hugsa orðin og þau bærust beint úr taugaboðsnemanum í gemsann?  Þá væri enginn sem héldi að maður væri í hrókasamræðum við sjálfan sig

Sumir eiga erfitt með að tala vegna sjúkdóms eða fötlunar. Þeir munu geta tjáð sig. Aðrir eiga við hreyfihömlun að stríða. Með hugsuninni einni munu þeir geta stjórnað t.d. hjólastól sínum.

 

Hugsið ykkur. Með svona búnaði gæti maður verið beintengdur við internetið alla daga og spurt Goooogle ráða þegar maður veit ekki svarið, og það án þess að nokkur yrði þess var. Verið í hugsanasambandi við vini og kunningja. Stóri bróðir gæti líka fylgst með okkur og gætt þess að við hugsum ekkert ljótt.  Þegar búið er að samtengja fólk á þennan hátt, verður þá hægt að tala um hópsál, þjóðarsál eða jafnvel alheimssál? Jæja, hættum þessu bulli...

Þetta er lyginni líkast, en búið er að þróa búnað sem virkar. Myndbandið frá Texas Instruments sýnir frumgerðina. Skrúfið hjóðstyrkinn vel upp og takið eftir að það tekur smá tíma að "tala" á þennan hátt, ...enn sem komið er. Takið eftir að hvorki varir né barkakýli þess er talar hreyfist. Meira á www.theaudeo.com

 

 

Sjón er sögu ríkari: 

 

Fleiri myndbönd um undratækið eru hér. 

 

Er þá ekki ráð að reyna að hugsa bara í myndum en ekki orðum? Nei, ekki aldeilis. Vísindamenn við Kaliforníuháskóla hafa fundið ráð við því. Sjá hér.  

 

Athugasemdir

[Gullvagninn (IP-tala skráð) 17.3.2008 kl. 08:37]

Þú ert alveg á réttri leið með "bullið" þitt, sjá blogg mitt um sama efni "Má bjóða þér flögu?".

[Sigurður Þór Guðjónsson, 17.3.2008 kl. 09:56]

Ekkert tæki mun bjóða upp á aðra eins misnotkun. Hugsið ykkur svona tæki í Guantanamo.

[Fjarki , 17.3.2008 kl. 11:56]

Og ég get ekki einu sinni fengið Símann(fyrirtækið) til að hjálpa mér með raddstýringu á GSM síma, sem þeir seldu með þeim formerkjum að hægt væri að nota hann án mannshandarinnar!

 Vona bara að þeir eigi ekki eftir að verða umboðsmenn fyrir svona búnað

[Marinó Már Marinósson, 17.3.2008 kl. 12:28]

Gefum stjórnmálamönnum svona síma. 

[DoctorE (IP-tala skráð) 17.3.2008 kl. 12:33]

Sko ef bloggið gæti lesið hugsanir mínar þá væri ég löngu kominn í steininn ;)

[Ágúst Ásgeirsson, 17.3.2008 kl. 14:22]

Maður ólst upp við það að mál- og heyrnarlausir gætu ekki notað síma, allavega þýddi ekkert að hringja í þá. Gemsinn hefur breytt þessu öllu - á því áttaði ég mig víst seint, ekki fyrr en í síðustu viku er ég sá mann halda gsm-síma á lofti á járnbrautarstöð í Frakklandi og hamaðst með fingramál fyrir framan hann. Sá hefur væntanlega verið að taka upp myndband sem hann hefur svo sent viðkomandi að "samtali" loknu. Frábært alveg.

[Ágúst H Bjarnason, 17.3.2008 kl. 22:44]

Ég hélt fyrst að þetta hlyti að vera gabb, en svo er víst ekki. Alveg makalaus tækni finnst mér.

[Ásdís Sigurðardóttir, 18.3.2008 kl. 22:23]

Þetta er ótrúlegt, en það er endalaust hvað maðurinn getur fundið upp    

[Ragnar Ágústsson, 23.3.2008 kl. 20:11]

Er þetta kannski næsta stökkbreyting mannkyns, óendanlegt minni, gríðarleg reiknigeta og fróðleikur í sálinni.

Án gríns, það sem hefur vantað í tölvur hingað til er ímyndunarafl sem er undirstaða skapandi hugsunar, þetta opnar nýjar víddir.

Erum við að opna kistil Pandoru?