Líkur á að fá allar tölur réttar í Lottó eru minni en 1:600.000

Ekki eru miklar líkur á að fá allar tölurnar í Lottóinu réttar. Líkurnar eru aðeins 1:658.008.

Við getum reiknað þetta út á eftirfarandi hátt: 

Í íslenska lottóinu eru í dag 40 kúlur með númerum frá 1  upp í 40. Það skiptir ekki máli í hvaða röð kúlurnar koma upp.

Ef við hugsum okkur fyrst að það skipti máli í hvaða röð númeruðu kúlurnar koma upp, þá eru fyrst 40 möguleikar á hvaða númer við drögum fyrst, næst 39 möguleikar (þar sem eitt númer er farið), þar næst 38 (þar sem tvö númer eru farin), o.s.frv.
Heildarfjöldi möguleika er því 40 x 39 x 38 x 37 x 36 = 78.960.960.

Nú skiptir ekki máli í hvaða röð tölurnar koma. Möguleikarnir á að raða upp fimm mismunandi kúlum í einhverja röð  eru 5 x 4 x 3 x 2 x 1 = 120.

Þetta þýðir, að ef það skiptir ekki máli í hvaða röð tölurnar koma, verða möguleikarnir á fjölda útkoma í Lottóinu 78.960.960 / 120 = 658.008.

Með öðrum orðum, líkurnar á því að vera með allar tölurnar réttar eru aðeins 1:658.008.

Á sama hátt getum við reiknað út líkurnar fyrir 38 kúlur eins og fjöldinn var fyrir nokkrum mánuðum; 1:501.942, og fyrir 32 kúlur eins og fjöldinn var fyrir allmörgum árum; 1:201.376.

Auðvitað má svo auka líkurnar með því að kaupa fleiri en eina röð, en það er allt annað mál.

 

Ekki spila ég í Lottó...

 

Vísindavefurinn: Hvað eru margir möguleikar á talnaröðum í íslenska lottóinu?

 

"Enginn var með allar lottótölur réttar í kvöld og gekk því aðalvinningurinn, sem var sexfaldur og nam 43,6 milljónum, því ekki út..." 

Sexfaldur lottóvinningur gekk ekki út

Athugasemdir

[Ásdís Sigurðardóttir, 9.8.2008 kl. 23:17]

Úff of flókið fyrir mig í kvöld, en ég vinn svosem aldrei svo ég geri mér engar grillur, á eina röð í áskrift og læt það duga. Kær kveðja

[Rúna Guðfinnsdóttir, 10.8.2008 kl. 02:25]

Gústi...það er ekki fallegt að eyðileggja drauma miðaldra húsmóður..

Kveðjur og heilsanir á höfuðborgarsvæðið.

[Jón Steinar Ragnarsson, 10.8.2008 kl. 03:22]

Venjulega kaupa menn 10 raða seðil, svo líkurnar fara þá niður í 1: 60.000. Ef þú kaupir 100 raðir, þá eru líkurnar 1:6000.

Þúsund raðir kosta milljón. og þá eru líkurnar væntanlega 1:60. Myndi maður leggja milljón undir til að velja eitt rétt spil af 60? 

10.000 raðir kosta 10 milljónir. Þá eru líkurnar 1:6 Myndi maður setja þann pening undir ef maður ætti að velja eitt spil af sex, svo ekki sé talað um að vinningurinn verði 10.000.000?

Maur þarf  60.000.000 til að vera öruggur, en þá tekur maður áhættuna á að einn eða fleiri geti verið með alla rétta líka, sem er ekki gáfulegt, þótt að vinningurinn væri 100.000.000.  Hann nær því ekki einu sinni að verða 60.000.000-Aldrei. Nálægt 30.000.000 hefur hann orðið, svo menn sjá hvert vitið er í þessu.

Ef þú spilar 10 raðir í viku í hvað 1200 ár ca. Þá er nokkuð líklegt að þú vinnir, en þó ekki gefið. Er það ekki rétt ályktað? Þú hefðir því þurft að byrja um landnám til að eiga séns í dag?

En...svo er það guð og lukkan

[Valsól (IP-tala skráð) 10.8.2008 kl. 11:50]

Ég var svo heppin fyrir nokkrum árum að vera með allar tölurnar réttar og potturinn var fimmfaldur. Ég hef aldrei spilað mikið í þessu Lottói og geri heldur ekki í dag. Ég veit hverjar líkurnar eru og veit líka að líkurnar á að vinna aftur eru hverfandi  

[fhb (IP-tala skráð) 10.8.2008 kl. 12:31]

Það vinnur alltaf einhver á endanum.

Ef maður tekur þátt, þá á maður jafn mikinn möguleika og næsti maður.

Heppni getur spilað með manni í það skiptið, ég sé ekki afhverju maður ætti ekki  að taka þátt þegar potturinn er svona stór.

Þetta er nú bara 1.000 kr.

Sem betur fer er ég ekki háður Lottó - ég spila aðeins þegar pottarnir verða mjög stórir - ef ég man eftir því að versla miða :)

Eigiði góðan dag.

kveðja,

fhb

[Júlíus Valsson, 10.8.2008 kl. 18:22]

Hvað eykur þú mikið líkurnar á vinningi með því að kaupa tvær raðir í stað einnar?

[Þorsteinn Briem, 10.8.2008 kl. 22:14]

Ása er kona einföld,
og ákaflega kynköld,
Lotta er betri,
á löngum vetri,
ég kannski á séns í kvöld.

[Kolbrún Baldursdóttir, 11.8.2008 kl. 20:01]

Spila bara aldrei í Lottó. Alltaf svona frekar óheppin í spilum en  heppin í ástum svona á síðari árum alla vega

[Rúna Guðfinnsdóttir, 11.8.2008 kl. 21:41]

Ég hef nú frekar dræmt uppúr Lottóinu...ætli það sé ekki svipað með ástina......

[Birna Dis Vilbertsdóttir (IP-tala skráð) 13.8.2008 kl. 11:13]

Ég vann einu sinni 4 réttar og bónustölu.Fékk þokkalegan aur

[Pétur Pétursson (IP-tala skráð) 14.8.2008 kl. 09:57]

Er athugasemd 3 rétt? Ég hélt að líkurnar myndu ekki aukast svona gríðarlega með því að fjölga röðunum í 10.