Mansal, starfsemi erlendra glæpahópa og óþarfa vera Íslendinga í Schengen...

 

 

"Mansal hefur farið vaxandi inni á Schengen-svæðinu eftir að það opnaðist í austur. Fyrir ekki mörgum árum var mansal bundið við þá skipulögðu glæpahópa sem voru hvað efstir í píramídanum, elstir, skipulagðastir með fullkomnasta kerfið. Eftir opnun svæðisins í austur hafa glæpahópar sem eru neðar í stiganum farið að starfa á sviði mansals, af því að það er orðinn markaður fyrir það sem þeir hafa að bjóða. Þeir þurfa ekki að smygla fólki inn á svæðið heldur geta þeir smyglað fólki innan svæðisins. Kannski erum við að sjá dæmi um það hér", segir Arnar Jensson tengslafulltrúi Íslands hjá Europol. Hann segir í Fréttablaðinu 23. október að í skipulagðri glæpastarfsemi stafi mest ógn af eiturlyfjum, en mansali þar á eftir.

 

Lögreglustjórinn á Suðurnesjum, Sigríður Björk Ingvarsdóttir, segir í Morgunblaðinu 23. okt.  að margir glæpahópar hérlendis, sem eru ýmist pólskir, litháiskír eða íslenskir, uppfylli skilgreiningu Europol á skipulagðri glæpastarfsemi. Þar geti verið um að ræða þjófnaði, efnahagsbrot, fíkniefnabrot, vændi, handrukkanir, peningaþvætti og mansal.

Á myndinni hér að ofan eru löndin sem tilheyra Schengen merkt með ljósbláum lit. Innan þess svæðis geta glæpamenn valsað óhindrað og eftirlitslaust að vild. Búlgaría og Rúmenia eru í biðsalnum að Schengen.  Eftirtektarvert er að Bretland og Írland skera sig úr með dökkbláum lit. Löndin eru í Evrópusambandinu, en ekki í Schengen.     Hvers vegna?    Jú þeir vilja vita hverjir koma inn í landið. Bretland og Írland eru eyjur  eins og Ísland svo landamæragæslan er auðveld. 
Eru Bretar og Írar miklu skynsamari en Íslendingar?

Það voru mikil afglöp þegar Ísland gerðist aðili að Schengen sáttmálanum. Á þeim tíma var því haldið fram að Schengen samstarfið skilaði lögreglu betri upplýsingum um glæpamenn en annars hefði verið. Því er þveröfugt farið. Reynslan sýnir okkur t.d. að við höfum ekki haft hugmynd þá misyndismenn sem hér hafa verið fyrr en of seint.  Ekki er hægt að afla upplýsinga um viðkomandi ólánsmenn sem hér hafa brotið lög fyrr en skaðinn er skeður.  Fyrr vitum við ekki hverjir eru hér á landi. Það er kjarni vandamálsins. Schengen kerfið virkar þannig. Það hefur ekki staðist væntingar.

Hér á landi er nákvæmlega ekkert eftirlit með þeim sem koma til landsins. Við vitum ekki hverjir koma til landsins, hvenær þeir komu eða hvenær þeir fóru aftur, þ.e. hafi þeir farið á annað borð. Að sjálfsögðu leynast óheiðarlegir Schengenborgarar meðal hinna heiðarlegu. Af þeim hljótum við að hafa miklar áhyggjur. 

Erlendir glæpamenn í farbanni taka bara næsta flug eins og ekkert sé og láta sig hverfa.

Ein birtingamynd Schengen aðildarinnar er  vopnaleitin undarlega á farþegum sem koma með flugi til Íslands frá Bandaríkjunum.   Ranghalarnir upp og niður stiga í flugstöðinni stafa einnig af þessari vitleysu. Hvað kostar allur þessi fáránleiki? 

Hvernig er það, veldur það okkur Íslendingum nokkrum vandræðum þegar við ferðumst til Englands, eða Englendingum vandræðum þegar þeir ferðast til meginlandsins?  Ekki hef ég orðið var við það. Eða, er vegabréfsskoðun á Íslandi þegar við komum frá landi sem er utan Schengen, t.d. Englandi, til trafala? Ekki finnst mér það.

Það kann að henta löndum á meginlandi Evrópu að taka þátt í Schengen samstarfinu, enda liggja þar akvegir þvers og kruss milli landa. Það er ekki þar með sagt að það sé viturlegt fyrir eylöndin Ísland, England og Írland að vera í Schengen. Það vita Bretar og Írar, og eru því ekki í Schengen, jafnvel þó þeir tilheyri Evrópusambandinu.

 

Á vef  Utanríkisráðuneytisins eru "almennar upplýsingar um Schengen". Þar stendur m.a:

Vegabréfin alltaf meðferðis!
Þótt þeir sem ferðast innan Schengen svæðisins verði ekki krafðir um vegabréf á landamærum er engu að síður mælt með því að fólk hafi ávallt vegabréf sitt með í för. Sú skylda er lögð á alla sem ferðast innan svæðisins að geta framvísað fullgildum persónuskilríkjum sem eru viðurkennd af öðrum Schengen ríkjum. Sem stendur er íslenska vegabréfið í raun eina skilríkið sem vissa er fyrir að önnur ríki viðurkenni sem gild persónuskilríki. Einnig kunna flugfélög á Schengen svæðinu að óska eftir því að sjá vegabréf farþega sinna.

Hvað í ósköpunum græðum við þá ef við eigum að hafa vegabréfin meðferðis?

 

Þegar upp er staðið, hver er kostur þess að vera í Schengen?  Ókostirnir eru aftur á móti fjölmargir. Fangelsin yfirfull af erlendum glæpamönnum, og enn fleiri ganga vafalítið lausir eins og tíð innbrot bera vitni um.

 

Lausnin á þessu óhefta flæði glæpamanna er einföld:

Við eigum að endurskoða aðild okkar að Schengen sáttmálanum án tafar. Það er ekki seinna vænna.  Við erum sjálfstæð friðsöm þjóð og viljum ekki að erlend glæpastarfssemi nái að skjóta hér rótum.

Förum að dæmi Íra og Breta.

 

Athugasemdir

[Rauða Ljónið, 24.10.2009 kl. 07:42]

Sæll. Ágúst þakka góða samantekt, það er kominn tíma að við sýnum sömu skinsemi og Írar og Englendingar.

[Þórir Kjartansson, 24.10.2009 kl. 08:46]

Var þetta ekki  fyrst og fremst eitt af snilldarverkum Halldórs Ásgrímssonar að koma okkur þarna inn?

[Rafn Haraldur Sigurðsson (IP-tala skráð) 24.10.2009 kl. 09:56]

Orð í tíma töluð. Burt með Schengen gáttina og lokum á innstreymi glæpagengja.

kveðja

[Vilhjálmur Eyþórsson, 24.10.2009 kl. 12:19]

Tek undir með Ágústi og öllum sem hingað til hafa tjáð sig. Úr Schengen! En hvað með Kyoto- steypuna? Í ljósi þess að háthita- og lághitasvæði á Íslandi innan og utan virkjana, auk eldfjalla, framleiða trúlega meira koldíoxíð á mann en annars staðar þekkist allan ársins hring, jafnvel þótt ekki sé eldgos, sýnist mér einsýnt að við förum strax úr því rugli. Helst strax í gær. Þar er um að ræða einhverja undarlegustu, nánast súrrealítísku steypu sem nokkurn tíma hefur komið upp. Ekkert bendir til að sú tímabundna uppsveifla í hitastigi sem sýnist nú vera að ljúka sé neitt öðru vísi enn ótal aðrar upp- og niðursveiflur í árþúsundir. Loftslag er ekki að hlýna aftur til lengri tíma. Jafnvel þó það væri að hlýna aftur þannig að jölklar hörfi aftur og eyðimerkur grói aftur upp væri það hið besta mál. Það er ósannað með öllu að koldíoxíð komi nokkru máli við. Þetta er hins vegar gullið tækifæri  fyrir pólitíkusa til að sýna mátt sinn og megin þenja út völd sín og, ekki síst, leggja á nýja skatta.

Um Kyoto má hafa orð Ólafs pá í Laxdælu: "Illa þykir mér gefast heimskra manna ráð, en því verr, sem þeir koma fleiri saman". 

Förum ekki aðeins úr Schengen, heldur einnig úr Kyoto! 

[Kolbrún Hilmars, 24.10.2009 kl. 17:35]

Sammála þessu, Ágúst, fáránleiki þess að Ísland hafi gerst landamæravörður Evrópu með Schengen er augljós þegar landakortið þitt er skoðað.

Annað er sem fáir nefna; hér áður fyrr gátum við ferðast til allra Norðurlandanna án vegabréfs, jafnvel án skilríkja yfirhöfuð. Nú þurfum við hins vegar alþjóðleg vegabréf og á þann hátt hefur þetta Schengen fyrirbæri jafnvel skert ferðafrelsi okkar frekar en hitt.

[Þorsteinn Valur Baldvinsson, 24.10.2009 kl. 18:59]

Uppsögn á schengen samkomulaginu er brýn nauðsyn

[Sigurður Ingólfsson, 24.10.2009 kl. 22:13]

Já sammála þér og hinum með úrsögn úr Schengen. Það er undarlegt að ferðast heim frá t.d. Afríku í gegn um London að þú skuli maður fara inn á Schengen svæðið loks þegar maður kemur heim og þá þurfi heilmiklar tilfæringar. Bretarnir eru líka að hugsa um ferðamennskuna. Miklu auðveldara er að sækja þá heim en önnur Evrópulönd. Hvað ætli við höfum misst af mörgum ferðamönnum frá Bandaríkjunum og annarsstaðar frá sem hafa ætlað að koma hingað en ekki nennt að verða sér úti um áritun á S. svæðið. Enda ekki auðvelt að hafa upp á íslenskum sendiráðum til að árita passa á S.svæðið. Svo má ekki bjóða fólki annars staðar frá að vera hér meira en 3 mánuði nema að giftast því ( !) Annars skal það hunskast út af S.svæðinu. Þetta er með ólíkindum.

[Kristinn Snævar Jónsson, 24.10.2009 kl. 23:09]

Það virðist ekki vera neitt nema óþægindi og fyrirhöfn og kostnaður við þátttöku í Schengen og lítt skiljanlegt að Ísland skyldi yfirhöfuð hafa gerst aðili að þessari glæpamannagirðingu. Það er fáránlegt þegar maður kemur frá Bandaríkjunum, eftir að vera búinn að fara í gegnum vopnaleit og tékk á flugvelli þar að þurfa að byrja á því við komuna til Keflavíkur að fara í gegnum samskonar leit beint úr flugvélinni. Ekki furða að ferðalangar sneiði hjá slíku skrípafyrirkomulagi ef þer eiga annars kost.

Íslendingar eiga að hætta aðild í Schengen án tafar, senda erlenda glæpahyskið sem tekur upp pláss í fangelsum landsins tafarlaust úr landi (þó viðkomandi eigi eftir að afplána dóma) og passa upp á það að viðkomandi komist aldrei til landsins aftur. Það getum við gert þegar við erum komin úr Schengen-vitleysunni.

Ég minnist þess ekki að hafa orðið fyrir neinum óþægindum sem ferðamaður milli landa áður en Ísland gerðist aðili að Schengen og ekki varð nein merkjanleg breyting þar á eftir það, nema til óþæginda við komu frá Bandaríkjunum.

Halldór Ásgrímsson beitti sér áberandi fyrir því á sínum tíma að Ísland gerðist aðili að Schengen og var mikli kostað til, jafnvel um 1,5 milljarður á verðlagi þá. Þess vegna eru eftirfarandi spurningar við hæfi til Halldórs og mætti hann svara: Hver átti ávinningurinn eiginlega að vera fyrir Ísland við að gerast aðili að Schengen? Finnst þér að hann hafi skilað sér að teknu tilliti til óþægindanna sem af þessu hefur hlotist ásamt glæpamannaflóðinu til landsins?