Halastjarna á himni skín. Myndir.

 

 

 

Myndin af halastjörnunni McNaught var tekin að morgni 9. janúar kl. 9:55. Skilyrði til myndatöku voru mjög góð og varla ský á himni. Myndavél var Canon 300D og linsa Tamron 300mm zoom. Lýsingartími 1,3 sek.  Ljósop F/11.  ISO 200. Brennivídd  119mm (35mm jafngildi 190mm).

 

Fróðleikur um halastjörnuna er hér: C/2006P1 McNaught 

Myndasafn á www.spaceweather.com

Þegar McNaught er horfin í glýju sólar, þá má hugsanlega sjá hana í skamma stund nánast í beinni útsendingu hér á mynd frá SOHO gervihnettinum, en þar má stundum sjá halastjörnur þjóta um: http://sohowww.nascom.nasa.gov/data/realtime/c3/512/

Íslensk vefsíða um stjörnuskoðun: http://stjornuskodun.is

 --- --- ---

 

Hale-Bopp 1997

 

Halastjarnan er Hale-Bopp, sem sást vel yfir Íslandi í byrjun árs 1997. Norðurljós náðu næstum að skemma myndina, en gera hana þó skemmtilegri. Takið eftir bláa halanum sem var ósýnilegur með berum augum. Neðst til hægri má sjá Andromeda stjörnuþokuna. Þar eru milljarðar sóla og örugglega mikið líf og fjör. Á þessari mynd má einnig sjá aragrúa stjarna, sem eru ósýnilegar með berum augum. Filma var Kodak PPF Pro 400 ASA. Linsa 135mm, Ljósop 3,5. Lýsingartími um 2 mínúur.  Stjörnuhimninum var fylgt eftir með mótordrifi. Undirritaður tók þessa mynd í mars 1997.

 

Þessi mynd af Hale-Bopp halastjörnunni var tekin um miðnætti skammt frá Keilisnesi að kvöldi 12 mars '97. Halastjarnan var þá í norðurátt yfir sjónum, en samt var töluverð ljósmengun frá stór-Reykjavík, Reykjanesbraut og Reykjanesbæ. Bjarminn á neðri hluta myndarinnar er þó ljósmengun af öðrum toga; nefnilega norðurljós!
Notuð var Pentax K-1000 sem komið var fyrir á mótordrifinu sem sést á myndinni hér fyrir ofan. Filma var Kodak PPF Pro 400 ASA. Linsa 135mm, Ljósop 3,5. Lýsingartími um 1 mínúta.

 

 

Hale-Bopp halastjarnan yfir Esju að kvöldi 18 mars '97. Myndin var tekin skömmu eftir miðnætti á Þingvallaveginum, skammt vestan afleggjarans að skíðasvæðinu í Skálafelli. 
Myndin var tekin með 35mm linsu, ljósop 3,5. Lýsingartími um 1 mínúta. Mótordrifið var notað, enda eru sjörnurnar sem punktar, en Esjan dálítið hreyfð!
Því sem næst fullt tungl var þegar myndin var tekin og gerir það hana dálítið undarlega; næstum eins og frá öðrum heimi. Vel má greina bláa rafskýið sem vísar upp frá halastjörnunni og græn norðurljós sem eru svipuð fyrirbæri. Litlu hvítu deplarnir á himninum eru ekki galli í filmu, heldur stjörnur. Á stækkaðri mynd má greinilega sjá að þær eru ekki allar hvítar; sumar eru bláleitar og aðrar rauðleitar.  Örfáum mínútum eftir að myndin var tekin hvarf halastjarnan í skýjabakkann sem kom æðandi úr suðri.

Skýring á eðli báu og hvítu halanna á Hale-Bopp er hér.

 

Athugasemdir

[Maria Agustsdottir (IP-tala skráð) 9.1.2007 kl. 20:25]

Þetta er ofsalega flott. Ætti hún að sjást hjá mér...? Maja

[Ágúst H Bjarnason, 9.1.2007 kl. 20:49]

Sæl Maja!

Halastjarnan verður bara sýnileg á morgun og fimmtudag. Hugsanlega verður hún horfin niður fyrir sjóndeildarhring á föstudag, eða öllu heldur orðin það nærri sólinni að hún hverfur í glýjuna. Ég veit ekki hvernig hún sést hjá þér í Oxford. Ég held að hún hljóti að sjást. Halastjarnan er í austri að morgni, og best að sjá hana rétt eftir að það byrjar að birta, en sólin samt vel undir sjóndeildarhringnum og himinninn sæmilega dökkur. Ég sá hana vel kl. 9:30 og fram yfir 10:30, en þá var farið að verða heldur bjart. Væntanlega hefði ég getað séð hana eiutthvað fyrr.

Myndin er tekin út um gluggann í vinnunni, og var stjarnan nánast yfir Vífilsfelli.

Einnig ætti hún að sjást í vestri skömmu eftir að sólin sest.

Eftir að hún hættir að sjást á norðurhveli jarðar næstu daga færir hún sig suðureftir og sést þá vel sunnan miðbaugs, en ekki hér.

Sjá nánar á http://stjornuskodun.is

[Ragnar (IP-tala skráð) 10.1.2007 kl. 11:25]

Svakalega er þetta flott mynd, ég ætla að athuga hvort ég nái að sjá hana hérna frá London. Það er sennilega ólíklegt vegna ljósmengunar, en það á að vera bjart seinnipartinn þ.a. það er aldrei að vita.