Tillaga: Björgunarsveitirnar fái hlutdeild í fyrirhuguðum ferðamannaskatti...

 

 

Aukinn straumur ferðamanna til landsins hefur valdið töluverðu viðbótar álagi hjá Björgunarveitunum. Erlendir ferðamenn eru ókunnir landinu og eiga það til að villast inn á ófæra vegaslóða eða einfaldlega týnast í gönguferðum, svo ekki sé minnst á þau tilvik þegar sækja þarf þá slasaða. Auðvitað á þetta einnig við um Íslendinga, en það eru hinir erlendu ferðamenn sem hafa valdið mjög auknu álagi á sjálfboðaliðana. Spár benda til að ferðamönnum eigi eftir að fjölga, og þar með eykst álagið á þessar hetjur okkar.  Björgunarsveitirnar hafa aldrei rukkað fyrir þessa þjónustu.

Ég geri það að tillögu minni að Landsbjörg / Björgunarsveitirnar fái verulegt árlegt framlag úr hinum fyrirhugaða ferðamannaskatti, hvort sem hann verður í formi náttúrupassa, gistináttagjalds eða breytts virðisaukaskatts.   Ég á von á því að margir séu mér sammála.

 

Það eru ekki eingöngu ferðamenn sem Björgunarsveitirnar aðstoða. Við þekkjum öll óbilgjarnt starf þeirra þegar óveður gengur yfir og mannvirki eru í hættu. Afrek þeirra og þorgæði á liðnu ári eru okkur í fersku minni. Snjóflóð hafa fallið, og stórslys orðið á undanförnum árum. Þá er gott að eiga þessa menn og konur að. Þessar hetjur okkar eru alltaf tilbúnar að hlaupa til, að nóttu sem degi, til að aðstoða. Þeir leggja sig oft í mikla hættu við björgunar- og hjálparstörf.

Hugsum okkur að svo sem tíundi hluti fyrirhugaðs ferðamannaskatt renni til björgunarsveitanna. Kannski meira. -  Gæti það ekki verið smá þakklætisvottur fyrir vel unnin störf?   Víst er að það kæmi Björgunarsveitunum vel.

 

 

Nú er að hefjast flugeldasala Björgunarsveitanna. Að sjálfsögðu munu sannir Íslendingar beina viðskiptum sínum til þeirra. Að sjálfsögðu...

Flugeldasalan er mikilvægasta einstaka fjáröflun flestra björgunarsveita landsins og í sumum tilfellum stendur flugeldasalan undir nær öllum rekstri einstakra björgunarsveita.  Björgunarsveitirnar ættu auðvitað ekki að þurfa að reiða sig eingöngu á flugeldasölu. Erlendir og innlendir ferðamenn mættu auðvitað leggja eitthvað af mörkum.

 

Hvað finnst þér lesandi góður?

 

 

 

 

 

www.landsbjorg.is

 

Myndirnar tók skrifarinn traustataki af vef Landsbjargar. Vona að það fyrirgefist.

 

 

 

 

Bestu óskir um gleðilegt og gæfuríkt nýtt ár

Athugasemdir

[Erla Magna Alexandersdóttir, 29.12.2014 kl. 09:26]

Það þarf ad styrkja björgunarsveitirnar þar eru menn og konur leggja sig í hættu fyrir aðra. Aðgengi erlendra ferðamanna ad veðurfréttum og öðru virðist líka skorta. Það er aðeins eitt með  fjármuni sem Íslenska ríkið eða þeirra handbendi innheimta það virðist sem þeir skili sér í vitlausa vasa.

[Ágúst H Bjarnason, 29.12.2014 kl. 20:28]

Takk fyrir Erla. Því miður er það þannig að fjármunir sem ríkinu er treyst til að innheimta skila sér oft ekki til réttra aðila. Vonandi yrði það þó ekki komi til þess að björgunarsveitirnar fái hlutdeild í þessum ferðamannaskatti.

[Ágúst H Bjarnason, 29.12.2014 kl. 20:31]

Bjarni Th. Bjarnason sveitarstjóri Dalvíkurbyggðar hafði samband við mig vegna pistilsins og tekur hann undir tillögu mína.

Hann skýrði mér frá því að á fundi sveitarstjórnar 16. desember hefði eftirfarandi ályktun verið samþykkt samhljóða, en fundargerðina má finna á vef sveitarfélagsins:

Ályktun um björgunarstörf

„Sveitarstjórn Dalvíkurbyggðar skorar á ríkisvaldið og Slysavarnafélagið Landsbjörg að taka björgunarmál á Íslandi til gagngerrar endurskoðunar og endurskipulagningar.

Fjöldi ferðamanna til Íslands eykst ár frá ári og áhugi Íslendinga á fjölbreyttri fjallamennsku hefur stór aukist á undanförnum árum. Þessar aðstæður hafa aukið álag björgunarsveitafólks sem oft á tíðum þarf að leggja sig í mikla hættu við björgunarstörf. Kröfur um kostnaðarsama menntun björgunarfólks og kröfur um bættan tækjabúnað hafa einnig aukist. Í mörgum þeirra landa sem við Íslendingar berum okkur saman við eru það herflokkar og heimavarnalið sem sinna björgunarstörfum. Björgunarsveitir á Íslandi eru byggðar upp með sjálfboðastarfi og njóta velvilja almennings og fyrirtækja en fleira þarf að koma til.

Náttúruperlur eins og fjöllin í Dalvíkurbyggð hafa mikið aðdráttarafl, sem er jákvætt, en hið neikvæða er að slysatíðni eykst í takt við aukinn fjölda fólks sem stundar fjallamennsku. Alvarleg slys hafa orðið á Tröllaskaga á undanförnum misserum og í ljós hefur komið í því sambandi að verkferlar við björgunarstörf hafa bæði verið óskýrir og þunglamalegir vegna flókinna reglna og tryggingamála.

Mikil umræða hefur verið um að tryggja fjármagn til verndunar ferðamannastaða vegna aukins ágangs á slíka staði. Að sama skapi þarf að huga að því að björgunarsveitum sé tryggt öruggt rekstrarumhverfi til að rækja hlutverk sitt. Tryggja þarf björgunarsveitum nægilegt fjármagn og að reglur og verkferlar séu skýrir.

Sveitarstjórn Dalvíkurbyggðar skorar á ríkisvaldið og Slysavarnafélagið Landsbjörg að taka nú höndum saman um breytingar á umhverfi björgunarmála á Íslandi sem miða að því að stórbæta möguleika björgunarsveita til að sinna sínu mikilvæga hlutverki við þær breyttu aðstæður sem nú eru uppi.“

http://www.dalvikurbyggd.is/

[Gunnar Th. Gunnarsson, 31.12.2014 kl. 08:15]

Góð hugmynd, ég styð hana.