Tunglmyrkvinn laugardaginn 3. mars.

Væntanlega viðrar ekki vel fyrir stjörnuskoðun meðan á tunglmyrkvanum stendur. Það er þó aldrei að vita nema tunglið gægist milli skýja.

Á Stjörnufræðivefnum www.stjornuskodun.is er góð lýsing á tunglmyrkvanum. Þar stendur m.a:

"Þann 3. mars næstkomandi (á laugardagskvöld) verður almyrkvi á tungli. Skuggi jarðar byrjar að færast yfir tunglið kl. 21:30 en sjálfur almyrkvinn hefst klukkan 22:44. Honum lýkur 23:57.

Verði veður hagstætt laugardaginn 3. mars næstkomandi ættu allir stjörnuáhugamenn að líta til himins og verða vitni að glæsilegu sjónarspili. Tunglið gengur þá inn fyrir skugga jarðar og almyrkvi á tungli á sér stað. Almyrkvinn 3. mars er sá eini sem sést frá Íslandi á þessu ári en næsti sýnilegi almyrkvi verður 21. febrúar árið 2008. Almyrkvinn nú er jafnframt sá fyrsti síðan 28. október árið 2004...."

Á Stjörnufræðivefnum er mikill fróðleikur um tunglmyrkvann sem vert er að skoða.

Mjög góð lýsing á tunglmyrkvanum er á bloggsíðu Finns Malmquist.

Myndin hér fyrir neðan er af almyrkvanum 3. mars síðastliðinn. Meira hér.

Ekki er nauðsynlegt að nota stjörnukíki til að fylgjast með myrkvanum, en miklu munar að nota venjulegan handsjónauka.

Hvernig ætli tunglmyrkvinn líti út séð frá tunglinu? Það sést á neðri myndinni, sem er reyndar samsett mynd úr mynd sem tekin var af jörðinni frá tunglinu og mynd af sólmyrkva. Auðvitað er þetta sólmyrkvi sem karlinn í tunglinu sér, því jörðin skyggir á sólina. Meira um þessa mynd á vefsiðunni Astronomical Picture of the Day.
 

Þegar rétt sést í sólina, eins og á myndinni, er talað um demantshring. Nánar hér.

 

 Tunglmyrkvi

 

 

Karlinn í tunglinu sér sólmyrkva 3. mars

Athugasemdir

[Guðríður Haraldsdóttir, 2.3.2007 kl. 23:36]

Vá, þetta eru snilldarmyndir!!! Horfi á tunglið í þessum skrifuðum orðum!

[Ágúst H Bjarnason, 2.3.2007 kl. 23:49]

Hægt verður að fylgjast með myrkvanum í beinni útsendingu á vefnum. Sjá hér

[Saumakonan, 3.3.2007 kl. 00:09]

vá... ekkert smá flottar myndir...   kem til með að setjast við gluggann með kíki annaðkvöld!

[Guðríður Haraldsdóttir, 3.3.2007 kl. 17:33]

Núna kl. 17.33 er skýjað er en grillir þó í himininn ... kannski ég geti mundað kíkinn í kvöld ... og líka horft á vefnum. Takk, Ágúst, þú ert snillingur! 

[Ágúst H Bjarnason, 3.3.2007 kl. 17:52]

Guðríður. Ég verð líka með kíki ef þar rofar til.  Annars kíki ég bara út um stofugluggann upp á Skaga ;-)

[Guðríður Haraldsdóttir, 3.3.2007 kl. 21:53]

Máninn lætur ekki sjá sig þannig að ég fylgist bara með á Netinu. Er ég nörd eða er ég nörd?

[Ágúst H Bjarnason, 3.3.2007 kl. 22:22]

Það eru fleiri en þú Guðríður nördar og fylgjast með á netinu :-)  Verst hvað það er mikið álag á þessar vefmyndavélar. Stundum sést ekkert. 

Annars sá ég myrkvann í október 2004 frá kofanum mínum sem er um 15km austar eða ofar en Fell, eiginlega efst í uppsveitunum.   Kvöldið byrjaði ekki vel, en skyndilega varð himininn nánast heiðskír. Liturinn á tunglinu var eins og á myndinni, appelsínurauður. Mjög óvenjuleg og falleg sjón. Litbrigðin eiginlega ólýsanleg þegar skugginn færðist yfir mánann.

[Guðný Anna Arnþórsdóttir, 3.3.2007 kl. 23:14]

Ohhhh, þetta er svo skemmtilegt. Er með kíkinn mundaðan, og er ekki einusinni að grínast.  Við erum samsafn af ekta nördum, við bloggstrumparnir!

[Guðný Anna Arnþórsdóttir, 3.3.2007 kl. 23:48]

Sá ekkert!