Paganini: Kaprísa No 24, Shlomo Mintz & Alison Balsom. Töfrum líkast.

Hér eru tvö myndbönd með frábærum tónlistarmönnum sem leika Kaprísu #24 eftir Nikkoló Paganini.

Hinn heimsþekkti fiðluleikari Shlomo Mintz leikur á fiðlu, en Alison Balsom leikur þetta erfiða verk af einstakri snilld á trompet.

Það er gaman að hlusta á þessa tvo snillinga flytja þetta stórfenglega verk. Auðvitað er frábært að hlusta á fiðluleikinn, en þegar verkið er leikið á trompet verður maður einfaldlega heillaður.

 

Shlomo Mintz er einn þekktasti fiðluleikari heims í dag. Hann stundaði nám m.a. hjá Isaac Stern og hóf einleikaraferil sinn 11 ára gamall með Fílharmóníusveitinni í Ísrael og stuttu síðar var hann beðinn um að hlaupa í skarðið fyrir Itzhak Perlman í Paganini Fiðlukonserti nr. 1  undir stjórn Zubin Metha.  Hann hefur nú í fjóra áratugi ferðast vítt og breytt um heiminn bæði sem hljómsveitarstjóri og fiðluleikari og haldið ótal tónleika í öllum þekktustu tónleikasölum heims.

Í tilefni fimmtugsafmælis síns þann 30. október á síðasta ári ákvað hann að fara í tónleikaferð um heiminn með Kaprísur Paganinis í farteskinu, en hann hélt tónleika hér á landi fyrir skömmu. (Af vef Midi.is).

 

Breski trompetleikarinn Alison Balsom er sannarlega ein af rísandi stjörnum hins klassíska tónlistarheims. Hún stundaði nám við Guildhall tónlistarskólann og Konservatoríið í París, auk þess sem hún sótti einkatíma hjá hinum þekkta sænska trompetleikara  Håkan Hardenberger. Árið 2006 hlaut hún titilinn „besti breski tónlistarmaður ársins“ á klassísku Brit-Awards verðlaunahátíðinni og sama ár fékk hún hlustendaverðlaun Klassísku FM-stöðvarinnar á Gramophone verðlaunaafhendingunni. Hún komst í úrslit keppninnar „Ungur einleikari ársins“ árið 1998 og kom í kjölfarið fram með öllum hljómsveitum BBC. Hún hlaut verðlaunin „Rísandi stjarna ársins“ á Echo Klassik-hátíðinni 2007.

Alison Balsom hefur m.a. komið fram sem einleikari með Fílharmóníuhljómsveitinni í Los Angeles, Parísarhljómsveitinni og Ensku kammerhljómsveitinni. Árið 2006 lék hún á lokakvöldi Proms-tónlistarhátíðarinnar sem þykir mikill heiður. Balsom er á samningi við EMI útgáfufyrirtækið og hefur leikið inn á þrjár geislaplötur og fengið afar lofsamlega dóma fyrir leik sinn. Hún var nýlega skipuð gestaprófessor í trompetleik við Guildhall-tónlistarskólann í Lundúnum.  Hún lék með Sinfóníuhljómsveitinni 25. október síðastliðinn. (Af vef Sinfó).

 

Blogg um tónleikana frá 26. október s.l.  Alison Balsom trompetleikari með Sinfóníuhljómsveitinni.

Nokkur myndbönd með Alison Balsom á blóggsíðunni hér. 

 

Fiðluleikarinn Shlomo Mintz ungur að árum. Gamalt VHS myndband.

 

 

 

 

 

Trompetleikarinn Alison Balsom.

Athugasemdir

[Ásdís Sigurðardóttir, 15.2.2008 kl. 19:12]

Einstök snilld, það er mikið rétt hjá þér, takk fyrir að deila. Góða helgi Ágúst minn.    

[Katrín Snæhólm Baldursdóttir, 15.2.2008 kl. 19:59]

Mjög flott....

[Þorvaldur Ágústsson (IP-tala skráð) 16.2.2008 kl. 00:06]

Sæll Ágúst.

Sannarlega er þetta frábær leikur hjá þeim báðum. Ég er sammála þér að trompetleikurinn er ekki síðri. Tónsmíðar Paganinis Fyrir fiðlu eru stórkostlegar áheyrnar og erfiðar fyrir fiðluleikarann. Það er ekki undarlegt þó að samtímamenn Paganinis hafi talið að hann hafi selt djöflinum sál sína fyrir snilligáfuna.

Kveðja.

Þorvaldur Ágústsson.

[Davíð Kristjánsson (IP-tala skráð) 16.2.2008 kl. 04:56]

Ég má til með að toppa þetta

Endilega sýnið þolinmæði til að skoða allt myndbandið

http://www.youtube.com/watch?v=H36vL3MzQDU

[Ágúst H Bjarnason, 16.2.2008 kl. 09:15]

Takk fyrir athugasemdirnar Ásdís og Katrín.

Þorvaldur, það er vissulega gaman að lesa um meistarann. Af nógu er að taka á netinu þar sem minnst er á djöfulinn. Hér er ein slík grein.

Takk Davíð fyrir að benda okkur á myndbandið með  Li Jie

[Rúna Guðfinnsdóttir, 16.2.2008 kl. 11:17]

Þetta er hreint frábært. Ég átti eina plötu sem var í sérstöku uppáhaldi hjá mér þegar ég var unglinur. Það var fiðluleikarinn Heifetz sem lék hvern fiðlukonsertinn af öðrum. Hreint frááábær plata.

Góða helgi.

[Ágúst H Bjarnason, 16.2.2008 kl. 11:28]

Rúna, þar sem þú minnist á Jascha Heifetz þá er Kaprísa 24 með honum hér á YouTube.

[Rúna Guðfinnsdóttir, 16.2.2008 kl. 11:32]

Takk Gústi..skelli mér í að skoða. Ég var að ljúka við að hlusta á  Li Jei..það  er stórkostlegt..alveg magnað, verða að segja það.

[Óli Ágústar (IP-tala skráð) 16.2.2008 kl. 16:38]

Kemst ekki hjá því að láta hrifningu mína í ljós.

Takk fyrir.